Faculty Lecture

WIKANG FILIPINO TUNGO SA GLOBALISASYON

Lakandupil C. Garcia, EdD
Pamantasang De La Salle-Dasmariñas

(Lektyur na binasa sa mga estudyante, guro at tagapangasiwa ng Imus Institute kaugnay ng pagdiriwang ng Buwan ng Wika, ika-30 ng Agosto, 2002)

Mapangahas at mapanghamon ang paksa ng Buwan ng Wikang Pambansa sa taong ito. Hindi lamang sumasaklaw sa buong Pilipinas ang tunguhin kundi ang buong mundo na! Marami tuloy ang tahimik na nagtatanong. Kung sa loob mismo ng bansang Pilipinas ay hindi pa gaanong natatanggap ang Filipino bilang wikang pambansa, paano pa kaya ito makakapasok sa larangang pandaigdig? Posible kaya ito o isa lamang pangarap na mahirap abutin? May mga patunay kaya, o kahit man lamang pahiwatig na ang ating wika ay makakasabay sa daloy ng globalisasyon? Mga mahahalagang tanong na tatangkain kong ipaliwanag sa lahat sa inyo ngayon, sa isang paraang praktikal at inaasahan kong lubos ninyong mauunawaan.

Kung naging bulaklak marahil ang tula ni Dr. Rizal na “Sa Aking mga Kabata,” tinitiyak kong luray na luray na ito ngayon sa madalas na paggamit tuwing ipagdiriwang ang Buwan ng Wika. Marami siguro ang nag-iisip na ikatutuwa ng bayani ang paulit-ulit na pagsambit ng nagpuputik na linyang, “ang hindi magmahal sa kanyang salita ay higit pa sa hayop at malansang isda.”..
more>>>